HEHIWANG

Ditranskripsikan dari naskah abad ke-19
beraksara “ka-ga-nga”
oleh DRS. H. IRFAN ANSHORY
(BATIN KESUMA NINGRAT)
Penyimbang Pekon Sukabanjar, Gunung Alip, Kab.Tanggamus


H I W A N G (I)
      Pekhahu anak cina, pekhayayi gumpeni, tangisku di dunia, hiwang kusanik nyanyi, nakhis nyak hilang nyawa, disan luhku tihili, budidayaku bela, pedomanku mak lagi, tepik pai kandang makhga, nyak lapah dang peduli, hiwangku di duwakha, amit di lawangkukhi, lijung lain hak suya, ngandankon khetok hati, kipak pekon kutangga, mak buguna di keti, nyak buwok belah siwa, bitah di tengah khesi, acak nyimbin dipa ya, nutuk nahasni khani, lapah pudaya-daya, wai khobok kugindami, mak gegoh khik keduwa, wat kodo hulun khedi, khamik khumpok ngewada, lamon sai ngagi-agi, khatong segala cuba, sakik semanjang hakhi, mak nemu sakhi gula, wai kusangka tengguli, luh tumban mak kukhasa, tulung umatmu nabi, ki pagun kheji juga, khepa haga lajuni, nyumang jak indai kanca, mak ikin tipubiti.

      Anak mukhip cakak bang, hulun ngelajakh ngaji, kayu khanting tikambang, kilu hidup nyak puwakhi, khena huwongni bawang, lagi wat sai ngimani, najin nayah sai malang, mak sampai injuk nyak ji, miwang nyak sakhadedok, naku luh netos tanggai, kada nyak khadu titok, tikambang tumbankon pai, injuk lonok di huwok, nampit kidang kabilai, ngehanja unyin khumpok, dalih lalang ngelahai, haga dipa nyak segok, malu putungga indai, luh bela badan langok, manuk lebon kelabai, alam pangkuan batin, putekhi simbukh cahya, khamik nihan pekhwatin, kidang mak guna diya, sakikni dikhi miskin, sedih sekhibu laksa, di dunia tisimbin, hukhik mak ngedok daya, khumpok ngelahai unyin, ngewada bujang papa, santokh nyak ngaji yasin, ngembaca allahumma, hiwang mak pandai balin, segala sekhba tuna, bulayakh nutuk angin, sai kuancam humbak bena.

      Nutuk gindamni bulan, ginjakhni matakhani, dikhi mawat sai ngiman, tepik mak kena sepok, khadu bulimban jaman, makkung wat injuk kheji, mulang mak bujenganan, tukhui di biding heni, sinjang bukhak keimbunan, kain mak nyangu lagi, haga ngangas mak ngasan, haga mengan mak bumi, nginum lain pemampan, akik wai khasa khuwi, mandang wai delom taman, gagit muneh nyak lawi, lijung induh hakhungan, singgah dipa do dikhi, khamik sai nyuya badan, khumpok beji sunyinni, kemakhau pitu bulan, ditiup labung pagi, kena hujan kebiyan, kati layauni hati, sakikku lain hanggan, khawang luh mak buhinti, tikas tali cancanan, nyembekhang patoh titi, mak dapok kupabanggan, mena luhku tihili, jak lunik sumban-umban, asing khang pukhakhepi, budu’a jama Tuhan, allahumma ya khabbi, hambamu kilu andan, sekhah sekujukh dikhi.

H I W A N G (II)
      Tengis pai nyak bubanggan, kemalanganni dikhi, sejakh guai bitian, khumpok pakhda ngedengi, anggop panas kebiyan, bang labung tegi khani, niku sumang haluan, mak seteguh di janji, matti mudah bulimban, tunai mutuskon tali, hamu mak ngikhi nganan, bang kikhani sebudi, ingok kham setunggaan, niku mulang jak mandi, nyelinggomkon basohan, ngimbangkon culuk kikhi, niku senyum nyangkiman, lesung pipit di bihom, jak isan hati nakan, dundom mawat sintani, sampai mak bangik mengan, pedom mak lelop lagi, dawah jadi pikikhan, debingi kuhanipi, kinandi sikhi nihan, nenggakhah matakhani, niku yu mas bekhlian, nyak kindo kawak besi, manjau nyak di pekhugan, niku khambak nyangkeli, kukhuntakon kicik’an, khepa inda-indani, ki nyak numpang labuhan, kham nyambung tali hati, kantu wat khanting dahan, bukhung numpang budandi, nyak hakhap kilu andan, pubandung diku lawi, nyak haga kehukhik’an, haku lagi sekeji.

      Api timbalmu ading, lagi kala dinana, kham nyikhokkon kagekhing, pepakhda ngandan cinta, munyai kelawan makhing, santokh pubandung kita, sanajin bumi gincing, hukhik mati jejama, khena do hamu ading, janjimu waktu sina, bang kikhani ngegunting, mak sepegung di cawa, bawak siang jak daging, nyak ngedengi bekhita, kita ukhung pusanding, niku pindah khanglaya, hamu kham mak sebanding, bang seucak di bangsa, gegoh ngembelah pekhing, tiangkat nyin binasa, daikin dipusahing, kalah nyak khadu nyata, nyak tungkah niku gading, nyak lesom niku gula, ibakhat nanjak tebing, cakak pugapa-gapa, jak tengah haguk biding, mak tantu inda-inda, sipa alam kutinding, sipa bumi kutangga, asing khang panas cuping, nengis khumpok ngehanja, kapan do hati hening, khadu genok dekhita, ki wat sepahmu ading, nyak kilu guai bukha.

      Injuk mak haga lipang, gegoh mak haga kheji, sakik lipang jak kundang, gegoh mati puwakhi, nyak ditahkon di khangkhang, kuk dikhilong mak lagi, niku mak temon sayang, ngampalaju nyak lawi, senginahni nyak lalang, ducakkon bangik hati, padahal hati cadang, susah haga kubiti, mengan mi khasa pahang, nginum wai khasa khuwi, kusonkon luhku miwang, pakai kulamku mandi, sangun khiya ki malang, lelakun tipekhinci, badan mak nungga senang, sakik singgah di dikhi, kidang kayak kham lipang, jak ki nyak sakik hati, mak nyesol nyak dibuang, ki cintamu mak lagi, kekalau nyak mak bimbang, hatiku tetop bani, mak ukhung kutekhajang, sanajin kuta besi, budu’a khik sembahyang, allah Tuhanku khabbi, jak kelom jadi tekhang, ki sabakh di takdikhni.

H I W A N G (III)
      Pungguk kebunyi debi, miwang nakhindu bulan, tanjokh tukhun di bumi, bang kheji punyandangan, moloh mak dapok lagi, anggok mak sekhalisan, mula pagun kubiti, mak ngedok sekhaduan, khadu janji khupani, bagian mula khiya, sukhatan jak ilahi, takdikhni sai kuasa, mengan debi mak pagi, pedom dimaling mata, mit di sai pukhakhepi, mak ngedok sai ngiman ya, allah Tuhanku khabbi, tubat gantungan nyawa, nalikut niku dikhi, bupengatu di sapa, nyak numpang kehukhik’an, sapa kuti sai sudi, mulang dipa do jengan, lijung dipa do sungi, lamban cadang pekhugan, cincin cabut jak jakhi, nyak nyandang kemalangan, sakha mawat buhinti, hakhiyuk sanding hujan, khunih metu debingi, dang dicancan nanggungan, acak kaskon sekali, dang niku miwang badan, sukhatan gegoh kheji, tetop-tetop buiman, dang ginjang-ginjuh lagi.

      Pusekam sikinduwa, pusibanni melayu, tangisni dikhi papa, pusiang makhi khadu, tukhiyang metah huma, tekhetuhni pembuyu, khatong segala hanja, tingkok segaga guyu, segakha lenak-lenau, laok tengkadak pagi, ginalah tisambayau, mawat inggonku lagi, labung neda kemakhau, luh jatuh kanan kikhi, jak khedik kisikh andau, ya do lelakunku ji, khobok kuanggop khilau, ngembabang nawai dikhi, gedahni hati layau, malang tukhun di bumi, jak lunik sinjang lilik, balak nanggung celaka, mak kukelimak hukhik, lain setahun khuwa, jaoh kelawan khedik, nyak sakhat bukakikha, jahat kucakkon betik, khena ki hati suya, susahku lain hanggik, mak pandai pakhda-pakhda, kinandi liwan sakik, kebuang mak budusa, kapan do nungga bangik, malu nyak dindai kanca, sengsakha anjak lunik, matti salah khanglaya.


      Sanak pungaji sukhat, pekhmulaan kaganga, induh kapan ya tamat, hiwangni bujang papa, mak kalipin ki hajat, nyebut kelawan du’a, khadu habis piyasat, butulak busesangga, pengatu kilu tulung, sapa kuti sai khila, pinsan pindua makkung, mentelu tangih nana, lapok mak jadi untung, luang mak jadi tuna, tekhetuh lambung bulung, tumban mawat buguna, bulayakh luah tanjung, nyikhang segakha bena, khatong humbak gumulung, jung kasat mak ketimba, bintang sayukku lawi, bulan mak payu bakha, samang handak kebunyi, mukhai gading nyuwakha, nyawa mak nekon dikhi, mak temon di hakhinga, mak sampai khasan hati, najin nyepok mak mansa, sedih mawat buhinti, khambak luh miwang juga, debingi dawah khani, payah delom dunia, dang dipekhingoh lagi, haga tiapikon diya, bagian mula kheji, dipapa sai kuasa.

H I W A N G (IV)
      Bismillah kalam gincing, nulis laluwang cina, sakik dikhiku ading, nyandang papa dunia, ibakhat bulung kiang, haga tikebang dipa, nyak hakhap kilu bimbing, nyin hatiku nekhima, bulung layu di batang, asing pikku ji tuna, niku yu kumbang khalang, nyak numpang khindu bunga, kidang timbalmu kundang, lagi kala dinana, niku mak tekhus tekhang, halus nihan khusia, kita pusimbat kicik, jamonjom tontong muka, pepakhda haga betik, hukhik kilu sangkuta, ana pakat kham adik, bang ganta api khupa, niku milih sai hanggik, sama timbang di bangsa, kukhuk di bulan khuwah, luah di bulan haji, api lagi tipenah, bulan sipa sai tianti, mulani kupabalah, mak ginjangni sengaji, bunuh ganta nyak kidah, nyin hak mati sekali, cawamu di nyak adik, bujang mati mekhanai, niku ngekhubah kicik, andai-andaimu sampai, sai demon diku khamik, khadu saka nyak pandai, niku tepik mak bangik, nyak tumban dipukacai.

      Nyak hakhap kilu tawai, guai sibikhni hati, nasib kham sapa pandai, induh khangni tihili, sakikni kham pucekhai, mawat dapok kubiti, ginalahku lain sai, mak nemu hening lagi, ki dapok khilongi pai, ki wat kasihmu lawi, mawat dapok kubagai, malangni dikhi sinji, kidang nyak mawat khabai, sabakh dalih pastiti, jemoh kelawan sawai, kekalau sugih dikhi, pekhahu layakh cambai, anak kuda melayu, sai ganggu kindo tunai, sai betik mak dihalu, banjikh balak niku wai, nyak hanyuk dipulaju, cawamu nengguli wai, budimu numokh satu, khemok buwok dipakai, khemok bamban sai dianggu, tehanyuk lain di wai, nyak kena di hakalmu, labung sai nekhai-tekhai, ngelitoh paku layu, niku lalang ngelahai, nyak miwang nampon dagu, punyanamu mak pandai, khadu saka nyak tahu, yu payu kusandang pai, sinji sai pembagimu.

      Daikin haku gila, pagun mak juga hamu, api khupani ganta, guai main-mainmu, kuteduh kumbang hakha, kikhani bunga tebu, kuteduh temon haga, kikhani ngampalaju, sangun haku jak saka, daikin tipulaju, kantu mak temon cinta, layau sasakh dikhiku, ganta buktini nyata, cawamu na ngangguyu, kebuang do nyak ganta, cadang angon andahmu, sakik mak ngedok timbang, miwang api gunani, asing khang pukakebang, lalayang putus tali, nyak yu keliang habang, huwok tikhahmu napi, bujang papa tikambang, mak patut khangmu mati, helu mak temu lesung, yu payu kutekhima, sasakh kham ki pubandung, bekhingin banjakh capa, nyak bukit niku gunung, kita sumang dunia, kantu kham pakhda langsung, masing-masing khanglaya.

H I W A N G (V)
      Nyumbah sikindua pun, Tuhanku sai kuasa, mahap kelawan ampun, dikhiku mandi dusa, kantu salah lelakun, gelakhni manusia, hambamu kilu santun, khabai kukhuk nekhaka, tangis kusanik pantun, tejang jadi cekhita, ki malang santokh pagun, asing khang sasakh daya, bela bulan khik tahun, genok segala cuba, mak gegoh injuk hulun, nyumang jak indai kanca, awi pisah jak khumpun, buluh mak ngedok khega, lapah putembuk tundun, ninggalkon kandang makhga, sangun khadu sukhatan, matti sakik kinandi, bagian anjak Tuhan, sinji janjimu hani, kekalau teguh iman, lelakun numpu dikhi, lumapah tudung tangan, haga dipa nyak lawi, khalik lamban bidang jan, mak takhu walawikhi, dipa pok kemanoman, disan jengan buhinti, mejong di penyikhingan, mengan saguni punti, hinekan buah khuntan, sai kuinum imbun pagi, puwakhi khik kemaman, mak ngiman di nyak lagi, induh lajumu badan, asing khang hulun beji.

      Asing niat mak sampai, sipa hajatku tuna, muluk lindung delom wai, dipa ya haga mansa, mak ikin tipubagai, sakik selama-lama, pangkhetisanni tanggai, kebuang induh dipa, badan mawat sai ngungai, khumpok ngojok ngewada, gumindam luh nakhenai, batui mak pandai bela, jukuk tuwoh di heni, sangsang nebak khanglaya, sukhau lebon santekhi, pekon mak bupunggawa, nenggakhah bintang pagi, pelita kukhang cahya, kumbangku mekakh debi, layu mawat buguna, sakik do niku dikhi, tubuh kukhungan nyawa, tikhajuh muneh hati, cawa temon dihada, takung bandung di mayang, kayu nangga duwakha, tandang mak dapok mulang, kipak mati mak haba, kubabangkon di lalang, sanajin hati papa, mak takhu khambak hiwang, mak tintang luh di mata, injuk keliang habang, hambokh mak ngedok daya, induh sungi tikambang, hakhunganku mak nyata.

      Tepik pai niku pekon, nyak lapah ngumban dikhi, minak muwakhi lamon, kidang api gunani, khamik kukhasa hiyon, hukhik samakh di mati, badan mak bupenganton, liom mawat timbangni, segalani mak temon, khanggom ki beji hati, kayak dikhiku lebon, mak buguna di keti, kheji ki dikhi malang, sengsakha mak bukhadu, acak nyak lapah midang, kekalau tungga gukhu, alam sipa kusikhang, tujuan makkung nantu, nyembekhang laok bandang, induh dipa ya laju, layakh kubabakh pinsan, mawat kugulung lagi, layau do niku badan, titok mak kena sepok, ngeliak dikhi tumban, lalang waya do kuti, mak ngedok sai nemadan, heni hilang sangbiji, nyebut pai nama Tuhan, ya amantu billahi, kugantungkon hakhapan, allahumma ya khabbi.

H I W A N G (VI)
      Nyalinggakh bunyi canang, pekhintahni penghulu, cempala dang ticapang, nanti tulahan kantu, wai tukhun jak pematang, humakha sai dituju, hana-hanani kundang, kupetunggal di niku, nenggakhah bulan tekhang, halinumu teliyu, lapah nyak sanga jimpang, mak lupa di janjimu, jejama ngandan sayang, kekalau jadi judu, bang kindo nyak dibuang, niku goi ngampalaju, payu kidah kham lipang, lajukon do khasanmu, mak ngeba nyak tikambang, lungah khusing ga niku, kekalau niku senang, tagan diya sai khadu, niku tisasah lalang, nyak layau mak bunantu, khanting sekhkah jak pampang, buwok jatuh jak hulu, asing khang pukakebang, sakha mak takhu-takhu, salesok’an nyak miwang, mejong di lambung batu, bukhak sinjang sakhilang, pengipus luh di dagu, batui mak pandai luang, matti sakik tinemu, nyak hakhap kilu babang, mid dipa bupengatu.

      Nyak tepik di khanglaya, kheji kodo padahni, dipupuh nasib papa, wai di lambung keladi, cawamu helau nana, hamu lagi sekeji, ngandan kumbang jejama, haga dang lipang lagi, kagekhing kita khuwa, mak ngedok anti kakhi, tilekokkon di dada, tisikhokkon di hati, mula kutunggu juga, kekalau khasan jadi, imbun jadi humakha, hanau jadi tengguli, bang niku nipu daya, ngampalaju nyak lawi, ninggalkon kulam tuna, ngembedak batangakhi, niku mudah tikena, tunai ngekhubah janji, keguda andah hakhta, niku ngembuang dikhi, tawaimu di nyak khepa, timbalmu di nyak api, mak nihan kahantakha, matti nalom ngembudi, yu payu kutekhima, acak nyimbin kakhnani, kantu niku hina ga, ki nyak tindihmu mati.

      Jukung pepahni khuntan, sampan kandas di heni, tikacah niku badan, ngelimak niku dikhi, genokni tenanggungan, ginalah injuk kheji, titok mawat sai ngiman, bela luh mak gunani, niku balin pilihan, mak liwih di nyak lagi, mak watikh di nyak tumban, mak haba di nyak mati, judu kham mak kasiwan, pulipang mak sintani, bang lebon di kebiyan, betik kham selama ji, kabakh jak kikhi kanan, bekhitamu kudengi, niku mena bulamban, cakak di pancaniti, khadu ngalih jenganan, khadu pindah nenggekhi, kagekhing putus pinsan, mit di nyak mak peduli, acak do kaskon hanan, nyin hak lebon jak bumi, bitah tinggal di huyan, kebuang mak bukheti, magoh nyak delom pulan, ngindayi bukhung debi, halok mak kehaluan, hunjak muneh sakikni, sembahyang di pangkalan, sujud di tengah bingi, budu’a jama Tuhan, sinji hambamu khabbi, kilu munyai mekhawan, mak gambang tahan uji, kekalau kedolokhan, nyak nemu lesai hati.***

Sumbekh Tulisan :
http://ikhfananshokhy.blogspot.com/2007_04_01_akhchive.html